गोंदिया, 17 सितंबर 2026 — सेवानिवृत्त मुख्याध्यापिकेच्या सुधारित पेन्शन बिलाचे काम करून धनादेश देण्यासाठी चार हजार रुपयांची लाच स्वीकारताना पंचायत समिती गोंदिया येथील कनिष्ठ सहाय्यकाला लाचलुचपत प्रतिबंधक विभागाने (एसीबी) 17 सप्टेंबर रोजी रंगेहात पकडले. ही कारवाई आस्थापना विभाग, पंचायत समिती गोंदिया येथे करण्यात आली.

आरोपीचे नाव संदीप शाहूराव सानप (31) असे असून तो पंचायत समितीच्या आस्थापना विभागात कनिष्ठ सहाय्यक म्हणून कार्यरत आहे. तक्रारदार महिला जिल्हा परिषद केंद्रीय प्राथमिक शाळा, दवणेवाडा येथे मुख्याध्यापिका होत्या आणि डिसेंबर 2020 मध्ये सेवानिवृत्त झाल्या होत्या.

तक्रारदार महिलेला अपेक्षेपेक्षा कमी पेन्शन मिळत असल्याने त्यांनी दुरुस्तीसाठी अर्ज केला होता. आरोपीने बिल पाच लाख रुपयांपेक्षा अधिक असल्याचे सांगून पाच हजार रुपये लाच मागितली होती आणि सुरुवातीला एक हजार रुपये स्वीकारले होते. एसीबीने पंच आणि व्हॉइस रेकॉर्डरसह पडताळणी करून सापळा रचला आणि उर्वरित चार हजार रुपये स्वीकारताना आरोपीला पकडले.